Servicios en comunicación Intercultural

Mundo Indígena al Día: Resumen semanal en Ashaninka, 21 de junio, 2010

Servindi, 23 de junio, 2010.- Continuamos con nuestro resumen semanal de noticias en lengua Ashaninka, gracias a un acuerdo con la Comunidad de Comunicadores Indígenas de la Selva Central (COCOI), base de la Red de Comunicadores Indígenas del Perú (REDCIP). Se autoriza la libre difusión y reproducción.

- Resumen noticias ashaninka 19 de junio (archivo mp3, 9 minutos, 26 segundos. Descargar con un clic en el enlace y elegir guardar como).

Resumen de noticias, al 19 de junio, 2010

(Nacional) Kamantaantsi Anampisato

(Especial sobre Ley de Consulta) Amenakota Sankenarentsi jitachari Ley de consulta

Jorame Tribunal Constitucional yoinijantakero vierneskiranki 18 kashirika Junio aparoni sentencia kantakotirori kametsa onati tikakobentaantsi jitachari Derecho a la consulta jero aisati obakobentiro proyecto de Ley matakotainchari Congresoki

Okame sankenarentsi antainchari amenakobentiro kametsa tikakobentaantsi jitachari ley de consulta kantakotiriri atiripee, aisati okanti ishintsinayetiri Estado irisampite paitarika ikoi irante.

Okantasanoti sankenarentsika orame sampitaantsi eiro opeashiyetatsi, iritake Estado kantakobenterone omonkaratantyari katakoyetainchari.

Yorame jibatakaantirori Banco Mundial itiankakenero sankenarentsi aapatiabakaantsiyetatsiri yamenakobentajeitiri atiripee nampitsikika Peru, ikantakakero kametsa onati sampitaantsi amenakobentainchari.

Aisari okempetaka Federación Internacional Tikakobentiriri atiripee okantakobentakero intsipaiji irimatero pinkatsari incharinkakoperotero Ley asi sampitaantsi, ikantakaabetakaro ari irimaterori 22ki yoka kashiri Junio

Okamee Federación, apatotiro 164 aapatiabakaantsitepe amenakobentirori tikakobentaantsi irashi atiripee poñeajetachari 100 Nampitsipee jitachari Paises

Okame Federacionka jero Pro Derechos Humanos (APRODEH) okantajeitake okame matakotainchari Congresoki Ley ashi Sampitaantsi osheki ojita, teempa antyaro obaaakobetaka, kenkeshireakaanakerori kantayetanainchari chapinki Baguaki.

Elizabeth León, jibatakaantirori amenakobentiro Comisión de Pueblos Andinos, Amazónicos jero Afroperuanos timatsiri Congresoki, oshintsinatatiri Pinkatsari Alan Garcia ontimatie intsipaiji incharinkero Ley ashi Sampitaantsi matakotainchari Congresoki.

Okame Ley matainchari osamani antaka, osheki amenakobentaka katsini ikarabentakero aisati especialistas antayetatsiri sabikatsiri Ejecutivoki.

Te nioteji paitarika yoiyakotiri kari icharinkakotantaro intsipaiji okame Ley, tempa irotake omonkaratya ishinetaantantetarori, okanti Elizabeth Leon.

Mario Palacios Pinkataribentirori Confederación Nacional de Comunidades Afectadas por la Minería (CONACAMI), ikantasanotake oraya kari icharinkakotasanotantaro okame Ley yokame Gobierno te irinintakaantero omatakobentya.

Teempa ari osokijakotakeri kamantamentotsiki Expreso, kantaitsiri. chora timakotatsiri kireki jeri empresariopee amenakobentiri CONFIEP iritake shintsinatiri Gobierno karitya icharinkakotantaro Ley ashi Sampitaantsi, imatakeri itsipareakakeri iyenkeshireanepe anta Consejoki irashiMinistrospe.

Internacional (KAMANRAANTSI PASHINISATO NAMPITSI)

Ecuador. Okaratiro pashinipee Nampitsiyetatsiri jero inampitsitepe atiri kempeteri yanijeitati maaroni ikoakotiro omatya mandato constitucional, ompeantajeari Ecuador Estado Plurinacional.

Okamee yanijeitica ari ipoñajeitakari anta antakerotanake nampitsi jitachari Puyo, arityame iraretyari Quitoki okame 21ki kashiri Junio aitakeme omatyari amenakobentya Parlamento Plurinacional..

Otimi shebajeitaantsi ijibatakaantiri Marlon Santos, pinkatsaribentirori CONAIE jeri jibatakaantayetirori Aapatiabakaantsi irashi atiripe kempeteri ijitiri Confederación de Nacionalidades Indígenas de la Amazonía Ecuatoriana (CONFENIAE).

Okame Aapatiabakaantsi oshintsibentiro ontimakote kipatsipee jeri Pinkatsaripee amenakobenterone kametsa inampitsitepe, onkisobatanakea tikakobentaantsi ashijei maaroni matakayerini intimakoyete paitapeerika, jero aisati iyotanepee

Bolivia.- Nampitsipe poñachari inchatomashitepeeki Bolivia, kempeterimacha yanijeitati okame kitaiterika, onkarati irinite 1400 kilometros, irosati iraretya nampitsiki jitachari La Paz inkantantyariri pinkatsari eiro yantanatiri iramenakotatieri kamtsa

Adolfo Chavez. Pinkatsribentirori Aapatiabakaantsi yamenakobentajeitiri atiripee akakerokatanakenta Bolivia jitachari CIDOB ikantake, okamee anibeetaantsi ari intanakari nampitsiki jitachari Trinidad, timatsiri akakerokatanake Santa Cruz ariya aretyari nampitsiki La Paz isabikinta Pinkatsari.

Ankarabentero Ñaantsipee- Okame kitaiteri abisanaintsiri antaita apatoitaantsi jibatakaantirori iñabejeitake amenakobentirori ñaantsipee, poñayetachari nampitsiki Colombia, Ecuador jero Peru

Okamee apatoitaantsi ari antaitari anta Universidadki Andina Simon Bolivar, timatsiri anta Quitoki Ecuador, ari onijantajeitaitirori kametsa ñaantsiyetatsiri jero aisati iyotaantsitepee nampitsipe pokajeitaitatsi.

Peru Brasil.- Orame sankenarentsi yantajeitakeri Brasil yero Peru impimantantyaariri gas poñaachari nampitsikika Peru, te irinintakojeiteri sabikayetatsiri otapikiitetanake Peru, kemperi. Puno, Cuzco. Madre de Dios jero Arequipa.

REDD.- Orame iyotinkaro Deborah Barry okantake orame amenakobentachari eiro okantabeetasanotajatsi pantajenkaantsiyetatsiri okantakapakari itsonkeetakero inchatomashi kametsari onabeta orairya aisati te onkante.

Arime okantakeri Tallerki Latinoamericano antaitachari pashinikiranki kitaiteri, okanti iro kantapaincha yokame intakaantayetaro te iramenakotero inchatomashipee, irointi ikinataka ikobajeitiri irinti.

Te añabetyaaroji amenakobentachane kametsa oraitya choratake proyectopee pinaterone atsimierone carbono

Guatemala . James Anaya, ñanatasanotatsiri naioneski Unidaski amenakobentirori tikakobentaantsi irashi atiripee iñaperotaitiro koityemotari nampitsisatipee atiri kempeteri sabikatsiri Guatemalaki.

Irome koityemojeitariri nampitsisati Guatemala te añeroji amenakobentya tikakobentaantsi kantakobenterine atiripee aisati yantanayeetiri iipatsitepeeki yamenayeetiri minapee.

Anaya, ijatantaitarimeeka Guatemalaki, yoiyakeri osheki atiri, ikarati 15,000 aabakeriri, poñainchari nampitsiki Sacatepequez, timatsiri 35 kilometros antakerontatanake Guatemala otiminta empresa Cementos Progresos.

Paraguay.- Amenakobentajetirori kametsaityaantsi inchatomashiki ikoakotakeri Gobierno, ontime “Katianeentakayarone intsonketero inchatomashi anta Chacopeki timatsiri Amerikaki.

Orame aapatiabakaantsi Popoaju okantake kametsa okanta amenakobentya katianentakayaarone eiro itsonkanteetaro inchatomashi, ontimantyari ontime kametsa pankirentsipee.

Iro kantaincha, yorame aayetapakerori kipatsipe yero Empresayetatsiri, irotake tsonkakerori inchatomashipee timatsiri Chakoki. yamenakobentapaakaro impiratya baka jero impankite soya transgenica. Ikantajeitake.

RELAJU. Oramee Red Latinoamericana de Antropología Jurídica (RELAJU) antatiero apatoitaantsi jitachari VII Congreso Internacional. Amenakobentero koityayetachari nampitsipeeki,jero tikakobentajeitaantsi.

Arime omatyari kitaiteriki 2 irosati 6ki cashiri Agosto anta Universidaki Ctolica nampitsika Peru. Ari impokajeiteri iyotinkaripe ñabeetatsine, kemperi Boaventura de Sousa (Portugal), Bartolomé Clavero (España), Rodolfo Stavenhagen (México), Esther Sánchez (Colombia) y Stefano Varese (Perú), jeri pashinipee.

Valoración: 
0
Sin votos (todavía)

Añadir nuevo comentario